NSEએ Listing સાથે જ દિગ્ગજ બજારોને પછાડ્યાં! BSE-MCX-IEXના સંયુક્ત મૂલ્ય કરતાં લગભગ બમણું

ભારતના સૌથી મોટા સ્ટોક એક્સચેન્જ National Stock Exchange of India (NSE)ના શેરનું લિસ્ટિંગ ભારતીય મૂડી બજાર માટે એક ઐતિહાસિક ઘટના બની હતી. લિસ્ટિંગ બાદ NSEનું માર્કેટ વેલ્યુએશન આશરે ₹4.45 લાખ કરોડ (₹4.45 ટ્રિલિયન) સુધી પહોંચી ગયું છે. આ સાથે NSE ભારતના લિસ્ટેડ માર્કેટ ઇન્ફ્રાસ્ટ્રક્ચર ક્ષેત્રમાં સૌથી મોટી કંપની તરીકે ઉભરી આવ્યું છે.

લિસ્ટિંગ બાદ NSEનું વેલ્યુએશન અન્ય મુખ્ય એક્સચેન્જ કંપનીઓની સરખામણીએ નોંધપાત્ર રીતે મોટું રહ્યું છે. રિપોર્ટ અનુસાર NSEનું માર્કેટ કેપ BSE, MCX અને IEXના સંયુક્ત માર્કેટ વેલ્યુએશન કરતાં લગભગ બમણું છે.  NSEના IPOમાં શેરનો ઇશ્યૂ પ્રાઇસ ₹1,785 પ્રતિ શેર નક્કી કરવામાં આવ્યો હતો. આ IPO સંપૂર્ણપણે Offer For Sale (OFS) હતો, એટલે કે કંપનીએ નવા શેર જારી કર્યા નથી અને IPOમાંથી સીધી મૂડી એકત્રિત કરી નથી.

BSE, MCX અને IEX કંપનીઓનું સંયુક્ત માર્કેટ કેપ ₹2.28 ટ્રિલિયન હતું. સવારે 10 વાગ્યાની સ્થિતિએ BSEનું માર્કેટ કેપ ₹1.31 ટ્રિલિયન, MCXનું ₹86,875 કરોડ અને IEXનું ₹9,973 કરોડ હતું. NSEના શેર આજે ₹1,800 પર લિસ્ટ થયા, જે તેના IPO ભાવ ₹1,785ની સરખામણીએ 0.84 ટકાનો વધારો દર્શાવે છે. NSE એ ટ્રેડિંગ એક્ટિવિટીની દ્રષ્ટિએ ભારતનું સૌથી મોટું એક્સચેન્જ છે, જેનો FY26માં કેશ-માર્કેટ ટર્નઓવરમાં 92.99 ટકા, ઇક્વિટી ફ્યુચર્સમાં 99.79 ટકા અને ઇક્વિટી ઓપ્શન્સ પ્રીમિયમ ટર્નઓવરમાં 74.71 ટકા બજાર હિસ્સો છે.

NSEની મજબૂત સ્થિતિ પાછળના મુખ્ય કારણો

NSEની ઊંચી વેલ્યુએશન પાછળ તેના મજબૂત બિઝનેસ મોડલ અને ભારતીય નાણાકીય બજારમાં તેની મહત્વપૂર્ણ ભૂમિકા જવાબદાર માનવામાં આવે છે. NSE ભારતમાં ઇક્વિટી ટ્રેડિંગ, ફ્યુચર્સ એન્ડ ઓપ્શન્સ (F&O), કરન્સી ડેરિવેટિવ્સ અને અન્ય નાણાકીય પ્રોડક્ટ્સ માટેનું સૌથી મોટું ટ્રેડિંગ પ્લેટફોર્મ છે. ખાસ કરીને ડેરિવેટિવ્સ સેગમેન્ટમાં NSEની વૈશ્વિક સ્તરે પણ મજબૂત હાજરી છે. એક્સચેન્જના બિઝનેસમાં ટેક્નોલોજી આધારિત ટ્રેડિંગ સિસ્ટમ, ઊંડી લિક્વિડિટી અને વિશાળ ટ્રેડિંગ નેટવર્ક તેની મુખ્ય તાકાત છે. ભારતના શેરબજારમાં રિટેલ રોકાણકારોની વધતી ભાગીદારી અને ડિજિટલ ઇન્વેસ્ટિંગના વિસ્તરણથી NSEને લાંબા ગાળે ફાયદો મળવાની અપેક્ષા છે.

રોકાણકારોની નજર ભવિષ્યના ગ્રોથ પર

NSEના લિસ્ટિંગ બાદ હવે રોકાણકારોની નજર કંપનીની આવક વૃદ્ધિ, માર્કેટ શેર જાળવી રાખવાની ક્ષમતા અને નવા બિઝનેસ સેગમેન્ટમાં વિસ્તરણ પર રહેશે. ભારતમાં કેપિટલ માર્કેટનું કદ સતત વધી રહ્યું છે. નવા ડીમેટ એકાઉન્ટ, મ્યુચ્યુઅલ ફંડમાં વધતા રોકાણ અને ટ્રેડિંગ પ્રવૃત્તિઓમાં વૃદ્ધિ NSE માટે મહત્વપૂર્ણ વૃદ્ધિ તક બની શકે છે. જોકે, એક્સચેન્જ બિઝનેસ પર નિયમનકારી ફેરફારો, ટ્રેડિંગ વોલ્યુમમાં ઉતાર-ચઢાવ અને સ્પર્ધાત્મક દબાણ જેવા પરિબળો પણ મહત્વપૂર્ણ રહેશે. NSEનું લિસ્ટિંગ ભારતીય નાણાકીય બજારના વિકાસમાં એક મહત્વપૂર્ણ માઈલસ્ટોન તરીકે જોવામાં આવી રહ્યું છે, કારણ કે હવે ભારતનું સૌથી મોટું એક્સચેન્જ જાહેર બજારમાં રોકાણકારો માટે ઉપલબ્ધ બન્યું છે.         

આ પણ વાંચો: NSE Share price: ₹1863ને પાર, 4 ટકા સાથે પોઝિટિવ લિસ્ટિંગ જોવા મળ્યું

આ પણ જુઓ: 

Watch onYouTube