Petrol-Diesel Export : પેટ્રોલ-ડીઝલ પર એક્સપોર્ટ ડ્યુટીમાં મૂકાયો કાપ, લોકોને લાભ મળશે કે નહીં?

કેન્દ્ર સરકારે આગામી પખવાડિયા એટલે કે 15 દિવસ માટે પેટ્રોલ, ડીઝલ અને ATF પર લાગતી એક્સપોર્ટ ડ્યુટીના નવા દર જાહેર કર્યા છે. નાણા મંત્રાલયના મહેસૂલ વિભાગે આ અંગે ત્રણ અલગ અલગ નોટિફિકેશન જાહેર કર્યા છે, જેમાં આ ઈંધણો પર લાગનારા ચાર્જમાં કાપ મૂકાયો હોવાની જાહેરાત કરી છે. જોકે, આ કાપ સાથે સામાન્ય લોકોને પેટ્રોલ અને ડીઝલના ભાવમાં ઘટાડાની રાહત મળવાની શક્યતા નહીવત છે.

પેટ્રોલ-ડીઝલ પર પણ મળી રાહત, ATFની કિંમત પર પણ અસર

પેટ્રોલ પર લાગતી એક્સપોર્ટ ડ્યુટી ઘટાડીને હવે પ્રતિ લીટર રૂ. 0.5 કરી દેવાઈ છે, જે અગાઉ પ્રતિ લીટર રૂ. 1.5 હતી. તેમાં સ્પેશિયલ એડિશનલ એક્સાઈઝ ડ્યુટી 0.5 રૂપિયા સુધી કરાઈ છે જ્યારે રોડ અને ઈન્ફ્રાસ્ટ્રક્ચર સેસ (RIC) શૂન્ય રખાઈ છે. ડીઝલ પર લાગનારી એક્સપોર્ટ ડ્યુટી પણ ઘટાડીને પ્રતિ લીટર રૂ. 20 કરાઈ છે, જે પહેલા પ્રતિ લીટર રૂ. 25 હતી. તેમાં SAED 20 રૂપિયા પ્રતિ લીટર નિશ્ચિત કરાઈ હતી જ્યારે RIC ડીઝલમાં પણ શૂન્ય કરાઈ છે. એવિએશન ટર્બાઈન ફ્યુઅલ એટલે કે ATF પર લાગતી ડ્યુટી ઘટાડીને પ્રતિ લીટર રૂ. 15 કરાઈ છે, જે પહેલાં પ્રતિ લીટર રૂ. 19 પ્રતિ લીટર હતી.

સેન્ટ્રલ એક્સાઈઝ કાયદા, 1944ની કલમ 5એ અને નાણાં કાયદા, 2002ની કલમ 147 હેઠળ કેન્દ્ર સરકારને મળેલી સત્તાઓનો ઉપયોગ કરતા એક્સપોર્ટ ડ્યુટીમાં ફેરફાર કરાયો છે. પેટ્રોલ અને ડીઝલ સાથે સંકળાયેલો સુધારો મૂળ નોટિફિકેશન નં.-06/2026 સેન્ટ્રલ એક્સાઈઝમાં કરાયા છે, જે માર્ચ 2026માં જાહેર કરાયું હતું. બીજીબાજુ ATF સાથે સંકળાયેલ સુધારો મૂળ નોટિફિકેશન નં.-08/2026 સેન્ટ્રલ એક્સાઈઝમાં કરાયો છે. આ સિવાય એક ત્રીજું નોટિફિકેશન 11-2026-સેન્ટ્રલ એક્સાઈઝમાં પણ સુધારો કરાયો છે, જેના હેઠળ નિશ્ચિત શ્રેણી પર લાગનાર દરને શૂન્ય કરી દેવાયો છે.

આ ત્રણે નોટિફિકેશનમાં સ્પષ્ટ કહેવાયું છે કે આ સુધારો રાજપત્રમાં પ્રકાશનની તારીખથી જ અમલી થઈ જશે. એટલે કે 16 સપ્ટેમ્બરથી નવા દર લાગુ થઈ ગયા છે. આ બધા નોટિફિકેશન પર નાણામંત્રાલયના અધિકારી ધીરજ શર્માના હસ્તાક્ષર છે. જોકે, આ મૂળ નોટિફિકેશન્સ પહેલા 1, સ્ટેમ્બર 2026ના રોજ સુધારો કરાયો હતો. પેટ્રોલ, ડીઝલ, ગેસ પરની એક્સાઈઝ ડ્યુટીમાં કાપથી મોટાભાગે ઓઈલ માર્કેટિંગ કંપનીઓ અને પેટ્રોલ પંપ ડીલરોને વધુ ફાયદો થઈ શકે તેમ છે.

Watch onYouTube