મુંબઈમાં લક્ઝરી ઘરોના ભાવ 6% વધ્યા: વિશ્વના પ્રાઇમ પ્રોપર્ટી માર્કેટમાં 8મું સ્થાન

મુંબઈનું પ્રીમિયમ હાઉસિંગ માર્કેટ (Premium Housing Market) ફરી વૈશ્વિક સ્તરે ચર્ચામાં આવ્યો છે. Knight Frankના Prime Global Cities Index Q2 2026 મુજબ, એપ્રિલથી જૂન 2026ની ત્રિમાસિક ગાળા સુધીના એક વર્ષમાં મુંબઈની પ્રાઇમ રેસિડેન્શિયલ પ્રોપર્ટીના ભાવ 6.2% વધ્યા છે. આ સાથે શહેર વિશ્વના 46 પ્રાઇમ હાઉસિંગ માર્કેટમાં આઠમા સ્થાને રહ્યું છે.

અહેવાલ મુજબ, ઇન્ડેક્સમાં સમાવિષ્ટ શહેરોમાં પ્રાઇમ રહેણાંક મિલકતોના ભાવમાં સરેરાશ 2.6%નો વાર્ષિક વધારો નોંધાયો હતો. મુંબઈનો 6.2%નો ભાવવધારો આ સરેરાશ કરતાં બમણાથી પણ વધુ છે. એપ્રિલ–જૂન 2026 દરમિયાન અગાઉની ત્રિમાસિકની સરખામણીએ પણ મુંબઈમાં ભાવ 1.7% વધ્યા હતા. પ્રાઇમ રેસિડેન્શિયલ પ્રોપર્ટી (Prime Residential Property)નો અર્થ શહેરના સૌથી મોંઘા અને પ્રીમિયમ રહેણાંક બજારની મિલકતો થાય છે.

મુંબઈ ઉપરાંત ભારતનાં બે અન્ય શહેરોએ પણ વૈશ્વિક ટોપ 20માં સ્થાન મેળવ્યું છે. બેંગલુરુમાં પ્રાઇમ પ્રોપર્ટીના ભાવ વાર્ષિક ધોરણે 4.5% વધતાં તે 12મા સ્થાને રહ્યું. નવી દિલ્હીમાં 3.9% વૃદ્ધિ નોંધાઈ અને તેને 17મું સ્થાન મળ્યું. આમ, ભારતનાં ત્રણ શહેરો આ યાદીના પ્રથમ 20માં સામેલ છે.

Knight Frank Indiaના જણાવ્યા મુજબ, મુંબઈનું વૈશ્વિક ટોપ 10માં સ્થાન મહત્વનું છે. શહેરના પ્રીમિયમ વિસ્તારોમાં સારી ગુણવત્તાવાળા અને વિશિષ્ટ રહેણાંક પ્રોજેક્ટ્સની માંગ ભાવને ટેકો આપી રહી છે. વૈશ્વિક ક્રમમાં ટોક્યો 50.7% વાર્ષિક ભાવવધારા સાથે પ્રથમ સ્થાને રહ્યું. મનીલા 14.6% સાથે બીજા, દુબઈ 10.9% સાથે ત્રીજા અને સિંગાપુર 9.5% સાથે ચોથા સ્થાને રહ્યું. દક્ષિણ કોરિયાનું સિયોલ પણ 6.4% વૃદ્ધિ સાથે ટોપ 10માં સામેલ છે.

જોકે, તમામ શહેરોમાં ભાવ વધ્યા નથી. અહેવાલ મુજબ, બેઇજિંગમાં 8.4%, ટોરોન્ટોમાં 7.3%, વેલિંગ્ટનમાં 5.4% અને લંડનમાં 3.6%નો વાર્ષિક ઘટાડો થયો છે. Knight Frankના ગ્લોબલ હેડ ઓફ રિસર્ચ લિયામ બેઇલીના મતે, વૈશ્વિક લક્ઝરી હાઉસિંગ માર્કેટમાં ધીમી સુધારાની નિશાનીઓ છે, પરંતુ સ્થાનિક પુરવઠો, ચલણમાં ફેરફાર, સંપત્તિ સર્જન અને વ્યાજદરને કારણે શહેરવાર પ્રદર્શન અલગ રહી શકે છે.

આ પણ વાંચો: ગલ્ફ દેશોમાં ચાલતા યુદ્ધથી ભારતનાં રિયલ એસ્ટેટમાં કેમ ઉદાસી છવાઈ

આ પણ જુઓ:

Watch onYouTube